أنواع الذهب المتوفرة في الأسواق الكويتية

أنواع الذهب المتوفرة في الأسواق الكويتية

الذهب مش مجرد معدن غالي الثمن، لكنه جزء مهم من الثقافة والعادات في الكويت، سواء كان للزينة، الاستثمار، أو كهدية في المناسبات، تلاقي اهتمام كبير بأنواعه ومصادره، عشان كده لما تروح تشتري ذهب في الكويت، هتلاحظ تنوع كبير في الأنواع والتصميمات، وكل نوع له مميزاته واستخداماته.

في المقال ده، هنعرفك على أشهر أنواع الذهب اللي بتتوفر في الأسواق الكويتية، وازاي تختار النوع المناسب حسب احتياجك، سواء للبس أو استثمار.

أولا: أنواع الذهب حسب العيار

من أهم العوامل اللي بتحدد نوع الذهب هو العيار، وهو النسبة اللي بتمثل كمية الذهب النقي داخل القطعة.

1. الذهب عيار 24

ده انقى انواع الذهب بنسبة نقاء 99.9٪، بيكون لونه أصفر لامع وقوي، لكنه طري وسهل الخدش او الانحناء، وعلشان كده مش بيستخدم كتير في المجوهرات اللي بتتلبس، بيكون مثالي للاستثمار على شكل سبائك أو عملات.

2. الذهب عيار 22

نسبة نقاءه تقريبا 91.6٪، وبيتم خلطه بنسبة بسيطة من المعادن التانية علشان يكون أقوى، بعض القطع التراثية أو الذهب الهندي والبحريني بيكونوا من النوع ده. بيتميز بلون أصفر غني وقوي.

3. الذهب عيار 21

ده الأكثر شيوعا في الأسواق الكويتية خصوصا للزينة، نسبه نقاءه حوالي 87.5٪، وهو متوازن من حيث الجودة والصلابة والسعر، تلاقي أغلب الأطقم والمجوهرات الكلاسيكية من العيار ده، ومناسب جدا للمناسبات والهدايا.

4. الذهب عيار 18

نسبة الذهب فيه حوالي 75٪، ومختلط بنسبة أكبر من المعادن الأخرى زي النحاس والفضة، بيتميز بلونه الأقل اصفرارا لكنه أقوى في التحمل، وبتلاقيه غالبا في التصاميم العصرية أو الإيطالية، خصوصا في الدبل والخواتم الحديثة.

ثانيا: أنواع الذهب حسب المصدر والتصميم

السوق الكويتي غني بقطع ذهب جاية من دول مختلفة، وكل نوع له طابع خاص بيميزه.

1. الذهب الكويتي

يتميز بالتصاميم الخليجية التقليدية اللي بتناسب الذوق العربي، فيه قطع كبيرة ومزخرفة، وبيكون أغلبه من عيار 21 أو 22
، الذهب الكويتي معروف بالجودة والدقة في الشغل، وفيه ثقة كبيرة بين الناس في قيمته.

2. الذهب البحريني

من أشهر وأجمل الأنواع في الخليج، معروف بتفاصيله الدقيقة وتصميماته التراثية، الذهب البحريني غالبا بيكون من عيار 21، وبيتميز بلونه الغني ونقشته الواضحة.

3. الذهب السعودي

شبيه جدا بالكويتي في العيار والتصميم، لكنه أحيانا بيكون بسعر أقل، بيتميز بالشكل الكلاسيكي والنقوش التقليدية، وبيتوفر منه أشكال مناسبة للزينة اليومية والمناسبات.

4. الذهب الإيطالي

ده النوع العصري اللي بيجذب الشباب والعرسان الجدد. التصميمات الإيطالية بتكون ناعمة، عصرية، وخفيفة الوزن،
غالبا بيكون من عيار 18، وبيتميز بمظهر أنيق جدا، لكنه بيكون أغلى في المصنعية.

5. الذهب الهندي

بيكون تقيل الوزن وغني بالنقوش، وغالبا بيستخدم في الأعراس والمناسبات، الذهب الهندي أحيانا بيكون من عيار 22 أو حتى 24، لكن لازم تنتبه إن فيه بعض الأنواع اللي بيكون فيها غش، فاشتري دايما من مصدر موثوق.

6. الذهب التركي

بيجمع بين الذوق العصري والشرقي، وتصميماته بتكون ملفتة وبلمسة أوروبية، بيتوفر منه عيارات مختلفة، خصوصا 21 و18،
الذهب التركي انتشر بشكل كبير في الكويت، لكنه زيه زي الإيطالي، مصنعيته عالية.

إزاي تختار نوع الذهب المناسب ليك

لو هدفك استثمار، يبقى الأفضل تختار الذهب عيار 24 في صورة سبائك أو عملات، لأن ده بيكون من غير مصنعية أو بمصنعية بسيطة، وسهل البيع.

أما لو بتشتري للزينة، فعيار 21 هو الأنسب لأنه متين وفي نفس الوقت بيحافظ على قيمة عالية، خصوصا لو اشتريت من ماركات معروفة أو تصاميم كلاسيكية.

ولو بتحب الشكل العصري والناعم، يبقى عيار 18 هو المناسب، خاصة في الأطقم الإيطالية والتركية.

نصائح مهمة قبل الشراء

1- تابع سعر الذهب يوميا من مصدر موثوق.

2- اسأل عن العيار وتأكد من وجود ختم رسمي على القطعة.

3- اسأل عن المصنعية بالتفصيل قبل ما تشتري.

4- اشتري من محلات معروفة ومعتمدة في الكويت.

5- احتفظ بالفاتورة، لأنها مهمة وقت البيع أو التبديل.

السوق الكويتي غني بأنواع كثيرة من الذهب، من حيث العيار والمصدر والتصميم، سواء كنت بتدور على قطعة للزينة أو بتستثمر في الذهب، مهم جدا إنك تكون عارف الفرق بين الأنواع علشان تشتري بذكاء وتستفيد بأقصى درجة ممكنة،
اختيار النوع المناسب بيبدأ من تحديد الهدف، ومتابعة السوق، والمعرفة الجيدة بالفروق بين كل نوع.

طريقة حساب مصنعية الذهب في الكويت